కత్తి మహేష్ కి జగన్ ప్రభుత్వం భారీ ఆర్థిక సహాయం
రోడ్డు ప్రమాదంలో తీవ్ర గాయాల పాలై చెన్నై హాస్పిటల్లో చికిత్స పొందుతున్న మహేష్ కత్తికి భారీ ఆర్థిక సహాయం చేసింది జగన్ ప్రభుత్వం.
వారం రోజుల క్రితం ఈయన చెన్నై, నెల్లూరు ప్రధాన రహదారిలో యాక్సిడెంట్కు గురికాగా, ఈ ప్రమాదంలో తల, ముక్కు, కళ్లకు తీవ్ర గాయాలయ్యాయి.
వెంటనే కత్తి మహేష్ను నెల్లూరులోని ఓ ప్రైవేటు హాస్పిటల్కు తరలించి వైద్యం అందించి తరువాత మెరుగైన చికిత్స కోసం అక్కడ్నుంచి చెన్నైకి తరలించారు.
అక్కడే ఈయనకు వారం రోజులుగా చికిత్స జరుగుతుంది. అయితే సోషల్ మీడియాలో మహేష్ కత్తి ఆరోగ్యం గురించి రోజుకో వార్త బయటికి వస్తూనే ఉంది.
ఓ రోజు పవన్ కళ్యాణ్ సహాయం చేసారని.. మరోరోజు అతడి అభిమానులు ఆర్థిక సాయం చేసారని.. మరోరోజు కుటుంబ సభ్యులే మొత్తం పెట్టుకుంటున్నారని.. ఇలా రోజుకో వార్త బయటికి వచ్చింది.
అయితే ఇప్పటి వరకు కేవలం కుటుంబం మాత్రమే మహేష్ కత్తి హాస్పిటల్ ఖర్చులన్నీ భరిస్తూ వచ్చినట్లు, ఇన్స్యూరెన్స్ పాలసీలు క్లైమ్ చేస్తున్నట్లు అతడి సన్నిహితులు చెబుతున్నారు.
తాజాగా ఆంధ్రప్రదేశ్ ముఖ్యమంత్రి వైఎస్ జగన్మోహన్ రెడ్డి కత్తి మహేష్ చికిత్స నిమిత్తం భారీ ఆర్థిక సహాయం ప్రకటించారు. కత్తి మహేష్ హాస్పిటల్ ఖర్చుల కోసం ఏకంగా 17 లక్షలు విడుదల చేసింది ఏపీ ప్రభుత్వం.